रसुवा।
चीनको तिब्बतबाट बग्ने लेन्दी खोलामा मंगलबार बिहान आएको भीषण बाढी र पहिरोले गोसाइँकुण्ड गाउँपालिका तहसनहस भएको छ। गाउँपालिका अध्यक्ष कैसाङ नुर्पु तामाङका अनुसार बाढी र पहिरोले कम्तीमा ९/१० स्थानमा सडक भत्काउँदा उद्धार तथा राहत कार्य ठप्पजस्तै भएको छ।
‘नौ/दश ठाउँमा बाटो भत्किएको छ, उद्धार र राहत सम्भव छैन जस्तो भयो,’ अध्यक्ष तामाङले बताउनुभयो।बाढीले टिमुरे र रसुवागढी क्षेत्रमा अत्यधिक क्षति पुर्याएको छ। नेपाल–चीन जोड्ने मितेरी पुल पूर्ण रूपमा बगाइसकेको छ। ड्राइपोर्टमा राखिएका विद्युतीय गाडीहरू बगाएका छन् भने हालसम्म १५ जना बेपत्ता छन्, जसमध्ये ३ जना नेपाल प्रहरी र केही चिनियाँ नागरिक छन्।
उहाँका अनुसार अहिलेसम्म ९ जनाको उद्धार भएको छ। तर मौसम प्रतिकूल भएकोले थप उद्धार कार्य जटिल बनेको छ।
स्थानीय बस्तीमा बाढी पसेको छैन, तर खोलाको किनारमा रहेका हाइड्रोपावर र ड्राइपोर्टका संरचनाहरूमा गम्भीर क्षति भएको जनाइएको छ।
अध्यक्ष तामाङ अहिले सदरमुकाम धुन्चेबाट समन्वय गरिरहेका छन्।‘माथिल्लो क्षेत्रमा पानी पर्न अझै नरोकिएकोले जोखिम कायमै छ, सबैलाई सतर्क रहन आग्रह गर्दछु,’ उहाँले भन्नुभयो।
