चितवन, १७ वैशाख । प्रेस संगठन चितवनले समाचार लेखेकै भरमा संगठनका सदस्य सुवास पण्डितलाई धम्की दिएको भन्दै गम्भिर ध्यानाकर्षण भएको जनाएको छ ।
संगठनका जिल्ला संयोजक प्रकास ज्ञवाली र सह संयोजक तीर्थ नेपालद्वारा जारी विज्ञप्तिमा संगठनका जिल्ला कमिटी सदस्य तथा अनलाइनखबरका चितवन सम्वाददातालाई धम्की दिएको मा आपत्ती जनाएको हो ।
बुधबार जारी विज्ञप्तीमा समाचार लेखेकै कारण चेतावनीसहितको धम्की दिनु निन्दनीय र खेदजनक रहेको उल्लेख छ । विज्ञप्तीमा भनिएको छ–‘अस्पतालका विषयमा प्रकाशित÷प्रसारित समाचार र लेख्ने पत्रकारलाई लक्षित गरी अखिल नेपाल प्रगतिशिल जनस्वास्थ्यकर्मी संघ र अखिल नेपाल प्रगतिशिल स्वास्थ्यकर्मी संगठनलगायतले विज्ञप्ती नै निकालेर ‘समाचार लेख्ने व्यक्तिहरुको पहिचान गरी आफैले आवश्यक कारवाही गर्ने’ चेतावनीसहित धम्की दिनु निन्दनीय र खेदजनक छ । प्रकाशित समाचार प्रति कुनै गुनासो भए कानुनी उपचारका मार्ग प्रशस्त हुँदाहुँदै पत्रकारलाई धम्की दिनु आपत्तिजनक छ ।’
संगठनले आमपत्रकारको सुरक्षा र प्रेस स्वतन्त्रताको रक्षा गर्न स्थानीय प्रशासनको ध्यानाकर्षण गराएको छ । केही दिन अघि सीसीटिभी फुटेजसहित कोरोना अस्पतालकै कर्मचारीले रातीको समयमा स्टोरबाट सामग्रीहरु चोरी गरी बाहिर निकालिएको समाचार प्रकाशित गरिएको थियो ।
समाचार प्रकाशित भएपछि स्वास्थ्यकर्मी संगठनले विज्ञप्ति प्रकाशित सञ्चार माध्यम र पत्रकारलाई धम्कीको भाषा प्रयोग गरी आफै कार्बाही गर्ने चेतावनी दिएको थियो । सत्यतथ्य समाचार बाहिर आएपछि चोरी गर्ने व्यक्ति र त्यसको बचाउका लागि विभिन्न सस्था लागिपरेका छन् । घटनाको चौतर्फी आलोचना र विरोध भएको छ ।