काठमाडौं, २१ फागुन :
युरोपियन च्याम्पियन्स लिगको प्रिक्वार्टरफाइनल अन्तिम-१६ दोस्रो लेगका खेलहरु मंगलबार रातिदेखि सुरु हुँदैछन् ।
मंगलबार मध्यरातमा हुने खेलमा साविक विजेता रियल मड्रिडले आयाक्स तथा इंग्लिस क्लब टोटनह्यामले जर्मन टोली बोरुसिया डर्टमण्डसँग प्रतिस्पर्धा गर्नेछन् । पहिलो लेगमा २–१ गोलअन्तरको जित हासिल गरेको रियल मड्रिडले मंगलबार राति आफ्नै मैदान सान्टियागो बर्नबाउमा आयाक्सको आतिथ्य गर्नेछ । दुई अवे गोलका कारण दोस्रो लेगमा रियललाई बराबरीकै नतिजा पनि क्वार्टरफाइनल प्रवेशका लागि पर्याप्त हुनेछ ।
यता बुण्डेस लिगाको शीर्ष स्थानमा रहेको डर्टमण्डले पहिलो लेगमा टोटनह्यामसँग उसकै मैदानमा ३–० गोलको पराजय ब्यहोरेको थियो ।
दोस्रो लेगमा पहिलो लेगको नतिजा उल्टाउनु उसका लागि कठिन चुनौति बन्ने निश्चित छ । तर, पनि घरेलु मैदानको उपयोग गर्न डर्टमण्ड कति सक्षम हुनेछ, त्यो हेर्न बाँकी छ । दुवै खेल राति पौने २ बजेदेखि सुरु हुनेछन् ।
