चितवन २५ फागुन । पूर्वी चितवनबाट जन्ती लिएर माडीको चिरौली फर्किदै गरेको बस आज साँझ दुर्घटना हुँदा एकजनाको मृत्यु भएको छ भने १५ जना घइते भएका छन् ।
माडी जादै गरेको बस चितवन राष्ट्रिय निकुञ्ज भित्रको जंगलछेउमा दुर्घटना हुदा माडी नगरपालिका वडा नं. २, चिरौलीका २८ वर्षीय मिथुन महतोको मृत्यु भएको चितवन प्रहरीले जनाएको छ । साँझ ५ः१५ बजे दुर्घटना भइ घाइते भएका महतोको उपचारका क्रममा भरतपुर अस्पतालमा मृत्यु भएको प्रहरीले जानकारी दिएको छ । दुर्घटनामा परेका माडी चिरौली क्षेत्रकै २० वर्षीया पुजा महतो र १४ वर्षीया क्षितिजा महतोको अवस्था समेत गम्भिर रहेको छ ।
घाइतेहरुको भरतपुर अस्पतालमा उपचार भैरहेको छ । घाइतेहरुमा किशोर उमेरका प्रकृति महतो, सकिना महतो, सपना महतो, बिशाल महतो, सुस्मिता महतो, सलिना महतो र बुद्ध महतो तथा अन्दाजी ५० वर्षीया गायत्री महतो रहनुभएको प्रहरीले जानकारी दिएको छ । दुर्घटनामा परेको जन्तीबस आफै अनियन्त्रित भई पल्टिएको र बसका चालक फरार रहेका छन् ।
