अख्तियारका अनुसार अस्पतालका ८ वटा बिल काउन्टरमार्फत ओपीडी लगायतका सेवाबाट संकलित रकम राजस्व खातामा नियमित रूपमा दाखिला नगरिएको उजुरीका आधारमा अनुसन्धान भएको थियो। अनुसन्धानका क्रममा आर्थिक वर्ष २०८०/ ०८१ मा बिलिङ सफ्टवेयरअनुसार जम्मा हुनुपर्ने ३ करोड ८७ लाख ६६ हजार ९७४ रुपैयाँ ८३ पैसामध्ये ३ करोड ४८ लाख ८९ हजार २५० रुपैयाँ मात्र दाखिला भएको पाइएको आयोगले जनाएको छ। बाँकी ३८ लाख ७७ हजार ७२४ रुपैयाँ ८३ पैसा दाखिला नगरी हिनामिना गरिएको ठहर गरिएको हो ।
आयोगका अनुसार बिल काउन्टरमा कार्यरत कर्मचारीहरूले संकलन गरेको रकम र बैंक भौचरअनुसार दाखिला भएको रकममा ठूलो अन्तर देखिएको छ। अहेव श्याम कुमार मण्डलले २५ लाख ४७ हजार ४१७ रुपैयाँभन्दा बढी, सरस्वती कुमारी यादवले ५ लाख २ हजार ८१३ रुपैयाँ, पूजा कुमारी यादवले २ लाख ८८ हजार २२९ रुपैयाँ, अजय कुमार मण्डलले ३ लाख ७९ हजार रुपैयाँभन्दा बढी तथा रोशन कुमार यादवले १ लाख ६४ हजार रुपैयाँभन्दा बढी रकम दाखिला नगरेको अख्तियारको निष्कर्ष छ ।
त्यस्तै, तत्कालीन प्रशासन प्रमुख अशोक कुमार सिंह र लेखा प्रमुख अशोक कुमार यादवले समेत आफ्नो पदको दुरुपयोग गरी मिलेमतोमा राजस्व हिनामिनामा संलग्न रहेको ठहर गर्दै उनीहरूमाथि पनि बिगो बराबरकै सजाय मागदाबी गरिएको छ। साथै, मृत्यु भइसकेका तत्कालीन लेखा प्रमुख रत्न प्रसाद मण्डलको हकमा कानुनी प्रावधानअनुसार बिगो असुलीका लागि उनकी श्रीमती मुस्कान कुमारी मण्डललाई प्रतिवादी बनाइएको छ ।
आयोगले सबै प्रतिवादीविरुद्ध भ्रष्टाचार निवारण ऐन, २०५९ बमोजिम कैद, जरिवाना र बिगो असुल उपर गर्न माग गर्दै विशेष अदालतमा मुद्दा दायर गरेको जनाएको छ।
